Basa Rinengga (Jangkep)

blog Indonesia-blogger

 

            Basa Rinengga yaiku salah sijine basa sing nduweni sipat endah (artistik) yaiku awujud sastra. Ing jagade kasusastran Jawa, basa sing endah kasebut lumrahe diarani basa rinengga. Dadi basa rinengga yaiku basa sing dipacaki, dipaesi, utawa dilewa-lewa supaya dadi endah. Jinise basa rinengga akeh banget. Salah sijine sing awujud unen-unen yaiku:

(1) Paribasan,

(2) bebasan,

(3) saloka, lan

(4) isbat.

Saliyane iku ana uga sing awujud:

(1) candra,

(2) rumpaka, lan

(3) sanepa.

Ana uga sing dienggo ing paramasastra kayadene:

(1) tembung saroja,

(2) yogyaswara,

(3) kerata basa,

(4) rura basa,

(5) tembung garba,

(6) tembung entar, lan

(7) dasanama.

Dene adhedhasar panganggone, basa rinengga ana sing awujud

(1) purwakanthi,

(2) sesanti,

(3) cangkriman,

(4) wangsalan,

(5) sandhi asma, lan

(6) sengkalan

 

Lumrahe basa rinengga kasebut dienggo sajrone reriptan sastra, pinathok, gancaran, apadene lakon. Kayata ing tembang macapat, guritan (puisi, parikan, kidung, singir, lelagon, suluk, japa mantra, crita cekak, novel, apadene drama.

 

A. BASA RINENGGA KANG AWUJUD UNEN-UNEN (UNGKAPAN)

1.  Paribasan

            Paribasan yaiku unen-unen kang gumathok (ajeg panganggone), mawa teges entar nanging ora ngemu surasa pepindhan. Tuladha:

a.     Rebutan balung tanpa sumsum

Tegese padudon sing disebabake barang sepele.

b.     Kenes ora ethes

Tegese wong wadon sing sugih omong/umuk nanging ora bisa mrantasi gawe.

c.      Yitna yuwana lena kena

Tegese sing ngati-ati bakal 'slamet suwalike sing sembrana bakal cilaka.

 

2.  Bebasan

       Bebasan yaiku unen-unen kang gumathok (ajeg panganggone) lan nduweni teges entar

kang ngemu surasa pepindhan. Dene sing dipindhakake sajrone bebasan yaiku kahanan utawa tindak-tanduke manungsa. Tuladha:

a.     Kerot ora nduwe untu

            Tegese darbe panjangka nanging ora nduwe sarana.

b.     Nabok nyilih tangan

Tegese namakake panggawe ala sarana nggunakake tenagane wong liya.

c.      Ngubak-ubak banyu bening

Tegese gawe rerusuh ing panggonan kang wus tentrem.

 

3.  Saloka

            Saloka yaiku unen-unen kang gumathok (ajeg panganggone) lan nduweni teges entar kang ngemu surasa pepindhan. Sing dipindhakake sajrone saloka yaiku manungsa. Tuladha:

a.     Belo melu seton

Tegese anut grubyuk sanajan ora ngerti dhodok selehe

b.     Kemladheyan ngajak sempal

Tegese sedulur ngajak marang kerusakan.

c.      Tengu ngedu gajah

Tegese wong cilik ngedu wong gedhe.

 

TABEL PRASAMAN, PAMBEDA, LAN TULADHANE PARIBASAN, BEBASAN, SALOKA
	Paribasan	Bebasan	Saloka
Persamaan Persamaan	Unen-unen kang gumathok (Ungkapan yang sudah tertetapkan)
	Nduweni teges entar (memiliki makna kiasan)
Pambeda Perbedaan	Ora nduweni makna pepindhan (pengandaian)	Nduweni makna pepindhan	Nduweni makna pepindhan
	-	Sing pindhakake kahanan (peristiwa) lan tingkah lakune manungsa	Sing dipindhakake manungsa
Tuladha Contoh	Rebutan balung tanpa sumsum	Nabok nyilih tangan	Belo melu seton

4.  Candra

            Nyandra tegese marna utawa nggambar kaendahan sarana pepindhan. Mula, candra yaiku unen-unen kang gumathok penganggone kanggo nyandra perangane awak, solah bawa, lan kahanane manungsa kanthi cara pepindhan. Tujuwan nyandra yaiku kanggo nggambarake kaendahane manungsa.

            Dene carane nyandra yaiku kanthi cara ngupamakake manungsa kasebut karo barang sing nduweni bleger, tindak tanduk, utawa kahanan sing padha. Candra dibage dadi telu, yaiku:

(1) candrane perangane awak,

(2) candrane solah bawa manungsa, lan

(3) candrane kahanane manungsa.

Tuladhane:

a.   Tuladha candrane perangane awak

1)  irunge ngudhup mlathi (ngrunggih)

2)  pipine nduren sajuring

3)  alise nanggal sepisan

b.  Tuladha candrane solah bawane manungsa

1)  lakune kaya macan luwe

2)  pangamuke kaya bantheng ketaton

3)  lambeane mblarak sempal

c.  Tuladha candrane kahanane manungsa

1)  talingan sir sinebit

2)  idep mangada-ada

3)  angga mubal dahana

5.  Rumpaka

            Salah sijine jinise cecandran yaiku rumpaka. Rumpaka asale saka tembung lingga 'rupa', oleh seselan {-um-} lan panambang {-an}, 'rumpakan', yaiku ngrupakake kahanane. Rumpaka meh padha karo candra, bedane sajrone rumpaka sing dipindhakake yaiku kahanan alam. Tuladhane kayadene gegambaran rumpakane pranata mangsa iki.

a.     Sotya murca ing embanan (mangsa kasa)

Tegese : Wiwit wit-witan padha brindhil

b.     Bantala rengka (mangsa karo)

Tegese : lemah-lemah padha nela (mlethek)

c.      Suta manut bapa (mangsa ketelu)

Tegese : wit gembili (gadhung) padha mrambat

d.     Waspa kumembenng jroning kalbu (mangsa kapat)

Tegese : tuk-tuk padha pipet (bumpet)

e.     Pancuran mas semawur ing jagat (mangsa kalima)

Tegese : wiwit akeh udan

f.       Rasa mulya kasucen (mangsa kanem)

Tegese : ungsum woh-wohan mirasa

g.     Wisa kentar ing maruta (mangsa kapitu)

Tegese : akeh lelara

h.     Ajrah jroning kayun (mangsa kawolu)

Tegese : mangsane kucing gandhik

i.        Wedharing wacana mulya (mangsa kasanga)

Tegese : mangsane gareng muni, gangsir ngenthir

j.       Gedhong minep jroning kalbu (mangsa sepuluh)

Tegese : akeh kewan meteng, manuk ngendhok

k.     Sotya sinara wedi (mangsa kasuwelas)

Tegese : mangsane manuk gloloh

l.        Tirta sah saking sasana (mangsa karolas)

Tegese : mangsa bedhidhing utawa adhem

 

Tuladhane rumpaka liyane upamane kaya ing ngisor iki

a.     Dhasar negari ingkang gemah ripah loh jinawi tata tentrem kerta raharja.

b.     Ana tlaga banyune bening, katon maya-maya biru kaya langit.

c.      Tentreme dalu wis kepara mungkasi. Ireng petenge jagad dadi padhang.

d.     Srengengene mleruk kaya wong lagi susah.

e.     Angine midid ing wit kenari

ngawe-awe mendhung ing langit Desember

Sansaya nggamang sansaya ireng

f.       Mangsa rendheng wis nyapa bumi

durung-durung wis branyak kabar sengsara

ana banjir tanpa wara-wara

ana gunung kirim pratandha

ana lemah jugrug ora aba ora rembug

g.     Gara-gara, kagiri-giri, gara gumita, lindhu prakempa, udan barat salah mangsa, galudhung guntur ketug, gelap mangampar-ampar.

  

6.  Sanepa

            Sanepa yaiku ukara pepindhan sing ajeg dhapukane, kedadeyan saka tembung kahanan/sipat sinambungan tembung aran. Sanepa wujude kayadene candra, nanging dhapukane wis pinathok, yaiku dumadi saka tembung kahanan sing digandheng karo tembung aran. Sanepa umume dienggo kanggo nyemoni, umume kanggo nggambarake kahanan. Tuladhane:

a.     Balunge atos debog: balunge empuk banget.

b.     Barange aji godhong garing: barange ora aji banget.

c.      Bobote abot kapuk: bobote entheng banget.

d.     Tatune arang kranjang: tatune kerep banget.

e.     Rembunge resik peceren: omongane rusuh banget.

f.       Suwene mijet wohing ranti: sedhela banget.

g.     Eseme pahit madu: eseme manis banget.

h.     Pikirane landhep dhengkul: pikirane bodho banget.

 

B.  BASA RINENGGA SING DIENGGO ING PARAMASASTRA (TATA KALIMAT DALAM BAHASA)

1)  Tembung Saroja

Tembung saroja yaiku tembung loro sing tegese padha lan dienggo bebarengan. Tuladhane: edi peni, gagah prakosa, rahayu widada, lsp.

 

2)  Yogyaswara

Yogyaswara yaiku tembung loro sing meh padha pocapane, mung beda wanda mburine, nduweni teges sepasang/lanang-wadon. Tuladhane: bethara-bethari, dewa-dewei, apsara-apsari, lsp.

 

3)  Kerata Basa  

Kerata basa yaiku cekakan (akronim), sawijine tembung dianggep nduwe teges/karep/ maksud tartamtu. Tuladhane, guru (digugu lan ditiru), garwa (sigaraning nyawa), cengkir (kencenge pikir), lsp.

 

4)  Rura Basa

Rura basa yaiku basa sing kleru nanging wis lumrah dienggo. Senajan salah, nangingwis lumrah dienggo, sing dijak omongan ya wis mudheng karepe. Tuladhane, nguleg sambel (kudune nguleg lombok, tomat, Isp), adang sega (kudune adang beras), nggodhog wedang (kudune nggodhog banyu).

5)  Tembung Garba

Tembung garba yaiku tembung loro/luwih sing diringkes dadi siji sarana nyuda wandane (suku kata) Tuladhane ana ing (aneng), sarwa endah (sarwendah), Isp.

 

6)  Tembung Entar

Tembung Entar yaiku tembung sing nduweni teges ora sabenere.

Tuladhane, dawa tangan (seneng nyolong), lunyu ilate (omongane mencla-mencle), Isp.

 

7)  Dasanama  

Dasanama yaiku tembung sing nduweni teges padha (sinonim).

Tuladhane, omah dasanamane griya, graha, gubug; banyu dasanamane tirta, warih, toya, Isp.

 

C.  BASA RINENGGA ADHEDHASAR PANGANGGONE

1.  Purwakanthi

            Purwakanthi yaiku nggandheng tulisan/swara, utawa ngrakit tembung kanthi ngruntutake swarane. Tuladhane guru sugih guna kawruh, ginugu sagung guneme (mbaleni wanda (suku kata) /gu/). Dene jinise purwakanthi ana telu, jlentrehane kaya mangkene.

a.     Purwakanthi guru swara

yaiku mbaleni wanda ing mburi. Tuladha: giri lusi janma tan kena ingina (mbaleni wanda swara /i/ lan /a/).

b.     Purwakanthi guru sastra

yaiku mbaleni tata tulis (huruf konsonan)/sastrane.

Tuladha: tata, titi, tatas tutug (mbaleni tulisan /t/).

c.      Purwakanthi guru lumaksita/guru basa

yaiku mbaleni wanda (suku kata) utawa tembung sing padha karo sing wis kasebut ing ngarepe.

Tuladha: ana dina ana upa (mbaleni: tembung ana).

 

2.  Sesanti

            Sesanti (semboyan/slogan) yaiku ukara sing isine pepuji utawa pandonga, tekad sing kuwat, pangarep-arep utawa pituduh kanggo tuntutan urip ing bebrayan. Umume dienggo dening paguyuban utawa patembayan, “kayadene ing instansi-instansi pamrentah.

            Tuladhane sesantine pamrentah sing ana ing logo pamrentahan Jawa Timur yaiku “jer basuki mawa beya”, sesantine warga Surabaya “salam wani”, sesantine jagad pendhidhikan nasional “tut wuri handayani” lan sapiturute. Sesanti uga bisa njupuk saka unen-unen Jawa liyane, upamane “suradira jayadiningrat lebur dening pangastuti”, lan sapanunggalane.

 

D. NITIKI ISI RERIPTAN SASTRA MAWA BASA RINENGGA

            Basa rinengga sing ana sajrone teks sastra dienggo kanggo sarana pepaes lan nambahi daya sastrane supaya luwih endah (estetis). Mula, kanggo nitiki basa rinengga kasebut uga kudu njingglengi makna sing kadhapuk. Carane yaiku:

1)  Maca sing setiti, nggatekake rakitan tembunge

2)  Nitiki makna sing ora salugune/sanyatane. Basa rinengga umume kanggo ndhapuk makna kanthi cara pepindhan/ ngupamakake, mulane kudu nitiki makna pepindhan kasebut.

3)  Negesi makna pepindhan kasebut kanggo ngerteni makna sing sabenere.

 

E.   NGGAWE RERIPTAN SASTRA MAWA BASA RINENGGA

            Basa rinengga pancen rumaket banget karo reriptan sastra. Pancen anane basa rinengga iku bisa nguripi reriptan sastra, saengga.nuwuhake daya sing maneka werna, upamane dadi luwih endah/estetis, mula bisa dadi sarana panglipur, bisa nikelake rasa pangrasa, lan sapiturute. Carane yaiku:

1)  Nemtokake arep nggawe reriptan apa, puisi apa prosa

2)  Nemtokake temane

3)  Nggawe reng-rengane

4)  Mbabar reng-rengan dadi tulisan kanthi nambahi basa rinengga, lan

5)  njingglengi maneh. 'asile, mriksa maknane lan tata tulis/ejaane.