TEKS LAPURAN ASIL OBSERVASI

TEKS LAPURAN ASIL OBSERVASI

pexels

TEGESE TEKS LAPURAN ASIL OBSERVASI

            Sadurunge ngrembug ngenani tegese teks lapuran asil observasi, luwih dhisik diandharake ngenani observasi. Observasi yaiku njinggleng sawijining objek tartamtu, bisa awujud kahanan alam utawa kahanan sosiyal. Observasi ditindakake kanthi cara, (1) njinggleng (ndeleng) langsung, (2) wawancara, (3) angket/kuisioner, lan (4) tintingan kapustakan. Cara-cara kang ditindakake kasebut, wekasane dadi dhata observasi. Dene wujud sugata dhata observasi, bisa didadekake infografis, dhaftar, tabel, bagan, dhiagram, lan peta/dhenah sing sabanjure diwenehi jlentrehane.

            Tegese teks lapuran asil observasi yaiku lapuran sing ditujokake marang pamaca sawise njingglengi sawijining perkara (objek) tartamtu. Lapuran kasebut diandharake lan dijlentrehake kanthi gamblang. Tujuwane supaya pamaca utawa wong sing nduweni kepentingan bisa luwih gampang ngerteni perkara sing dijingglengi.

JINISE TEKS LAPURAN ASIL OBSERVASI

            Adhedhasar objek sing diobservasi, jinise teks lapuran asil observasi ana loro, yaiku lapuran dheskriptif lan eksperimental.

1.    Lapuran dheskripsif yaiku ngandharake lan njlentrehake objek sing diobservasi (dijinggengi) kanthi cara langsung.

2.    Lapuran eksperimental ditindakake kanthi cara uji coba marang sawijine objek kanggo mbuktekake hipotesis.

TITIKANE TEKS LAPURAN ASIL OBSERVASI

            Titikane teks lapuran asil observasi dheskriptif lan eksperimental, nduweni titikan kaya ing ngisor iki.

1.    Asipat objektif lan faktuwal, tegese sakabehe dhata kang diandharake slaras karo kedadeyan sing sabenere, ditulis nganggo purusa katelu.

2.    Sistematis, yaiku andharan kang diandharake kanthi urut (koheren) lan tumata.

3.    Asipat netral, tegese lapuran asil observasi ora kena mihak salah siji klompok tartamtu.

4.    Ditulis kanthi cara referensial lan nduweni visi intelektual, ora nyimpang karo topike.

5.    Nggunakake basa kang baku (ilmiyah) lan komunikatif.

 

WANGUN TEKS LAPURAN ASIL OBSERVASI

            Wangun teks lapuran asil observasi umume diperang dadi telu, yaiku idhentifikasi, klasifikasi, lan dheskripsi.

1.    Idhentifikasi, yaiku gambaran umum ngenani sawijine objek sing dijingglengi.

2.    Klasifikasi, yaiku merang kang awujud gagasan saben pada.

3.    Dheskripsi, yaiku andharan lan jlentrehan saka perangan/klasifikasine.

 

Dene miturut jinise, wangun teks lapuran asil observasi ana loro, yaiku teks lapuran asil observasi dheskriptif lan eksperimental.

1.    Wangun teks lapuran asil observasi dheskriptif:

a.       judhul lapuran

b.      purwaka

c.       andharan lan jlentrehan

d.      panutup

 

2.    Wangun teks lapuran asil observasi eksperimental:

a.       judhul lapuran

b.      abstrak (ringkesan)

c.       purwaka (landhesan panliten, underane panliten, paedahe panliten, ancase panliten)

d.      tintingan kapustakan

e.       metodhe panliten

f.       andharan lan jlentrehan

g.      panutup (dudutan lan pamrrayoga)

h.      katrangan panjangkep (kapustakan, transkrip wawancara, idhentitas informan, lsp)

 

WANGUN BASA TEKS LAPURAN ASIL OBSERVASI

Wangun basa kang digunakake sajrone teks lapuran asil observasi umume yaiku (1) tembung wilangan, (2) ukara lamba lan camboran. Andharane kaya mangkene.

 

1.      Tembung Wilangan

Tembung wilangan yaiku tembung sing mratelakake cacah utawa urut-urutan. Tembung wilangan kaperang dadi rong golongan, yaiku tembung wilangan kang mratelakake cacahe barang lan tembung wilangan kang mratelakake cacahe pepangkatan.

a.       Tembung wilangan kang mratelakake cacahe barang dadi papat. Andharane mangkene.

1)      Tembung wilangan wutuh/baku. Tuladha:

1     =  siji                 11  =    sewelas              21               =  selikur 

2     =  loro               12   =  rolas                   22               =  rolikur

3     =  telu               13   =  telulas                25               =  selawe

4     =  papat             14   =  patbelas             50               =   seket

5     =  lima               15   =  limalas               60               =  sewidak

6     =  enem             16   =  nembelas           100             =  satus

7     =  pitu               17   =  pitulas                200             =  rong atus

8     =  wolu             18   =  wolulas              1000           =   sewu     

9     =  sanga            19   =  sangalas             10. 000       =  sepuluh ewu

10   =  sepuluh         20   =  rongpuluh          1.000.000   =   sayuta, lsp.

                       

Katrangan:

a)  Cacah saluwihe sepuluh oleh wuwuhan -las, dene saluwihe rongpuluh oleh wuwuhan -likur, kajaba 25 (selawe).

b) Cacah saluwihe telungpuluh anggone ngucapake yaiku 31 (telungpuluh siji), 32 (telungpuluh loro), 33 (telungpuluh telu), lan sateruse. Semono uga saluwihe 40 (patang puluh) anggone ngucapake yaiku  41 (patangpuluh siji), 42 (patangpuluh loro), 43 (patangpuluh telu) lan sateruse.

c)  Cacah tetikelane sepuluh oleh wuwuhan -puluh, kajaba 50 (seket) lan 60 (sewidak). Tuladha:

            10   =  sepuluh              40   =   patang puluh     70 =  pitung puluh

            20   =  rong puluh         50   =  seket                  80 =  wolung puluh

            30   =  telung puluh      60   =  sewidak             90 =  sangang puluh

d) Cacah tetikelane satus oleh wuwuhan -atus. Tuladha:

            100 =  satus                   400      =  patangatus     700 =  pitungatus    

            200 =  rongatus             500 =  limangatus         800 =  wolungatus

            300 =  telungatus          600 =  nematus             900 =  sangangatus

e) Cacah tetikelane sewu oleh wuwuhan  -ewu, wondene tetikelane yuta oleh wuwuhan -yuta. Tuladha:

1.000          =  sewu    

2.000          =  rong ewu         

3.000          =  telung ewu      

4.250          =  patang ewu rong atus seket

10.724        =  sepuluh ewu pitung atus patlikur

100.870      =  satus ewu wolung atus pitung puluh 

1.572.625   =  sayuta limang atus pitung puluh ewu nematus selawe              

5.350.732   =  limang yuta telung atus seket ewu pitung atus telung puluh loro

                       

2)      Mratelakake barang sing durung genah cacahe. Tuladha: akeh, sethithik, kabeh, lsp.

3)      Mratelakake angka wektu. Tuladha:

12.00  =  tabuh rolas awan

24.00   =  tabuh rolas bengi

12.30   =  tabuh setengah siji awan

23.30   =  tabuh setengah rolas bengi

13.15   =  tabuh siji seprapat awan

07.45   =  tabuh wolu kurang seprapat esuk

 

4)      Mratelakake cacah pecahan. Tuladha:

^1/5         =  sapraliman  

¼         =  seprapat      

½         =  setengah     

¾         =  telungprapat                               

_2/5         =  loro praliman

0,6       =  nem pradasan

0,08     =  wolu praatus

0,475   =  patangatus pitung puluh lima praewon

0,698   =  nematus sangangpuluh wolu praewon, lsp.                   

 

b.      Tembung Wilangan kang mratelakake Pepangkatan. Panganggone:

1)      Kanggo mratelakake pepangkatane (undha usuke) wilangan nggunakake ater-ater {ka-}. Tuladha: kapisan, kapindho (kaloro), katelu, kapapat, kalima, lsp.

2)      Kanggo mratelakake kaping pira anggone tumindak, tembung wilangan oleh wuwuhan kaping utawa ping. Tuladha: kaping pisan (ping pisan), kaping pindho (ping pindho), lsp.

 

 

Pangecake Tembung Wilangan:

a.       Yen nerangake akehe barang, tembung wilangan manggon ing samburine. Tuladha:

1) Wati tuku pulpen akehe lima.

2) Budi nggawa jajan papat

b.      Yen mratelakake ukuran utawa jinis, tembung wilangan manggo ing ngarepe. Tuladha:

1) Ali tuku solar patang liter.

2) Gedhung iku dhuwure pitung meter.

3) Ibu mundhut sendhok setengah lusin.

4) Aku tuku jajan entek telungewu rupiyah.

 

2.      Ukara Lamba lan Ukara Camboran

a.       Ukara Lamba

Ukara lamba yaiku ukara kang kedadeyan saka ukara gatra cacahe siji. Upamane, Mas Joni kelangan jaket. Ukara kasebut dumadi saka jejer; Mas Joni, wasesa; kelangan, lan lesan; jaket. Ukara lamba uka bisa diwuwuhi katrangan (panggonan utawa wektu). Upamane, (1) lampu kuwi nggantung ing satengahing pendhapa, (2) wingi bengi, Mbah Kakung seda.

b.      Ukara Camboran

Ukara camboran yaiku gabungan saka rong ukara lamba utawa luwih. Umume, diwenehi pangiket “lan,” “utawa,” “dene,” bisa uga “apa dene.” Tuladhane, Ali mider golek penggaweyan, dene sedulur-sedulure, ora bisa mbiyantu. Ukara camboran cacahe ana loro, yaiku ukara camboran sejajar lan ukara camboran ora sejajar. Andharane kaya mangkene.

1)      Ukara Camboran Sajejar

Ukara camboran sajajar yaiku gabungan saka rong ukara lamba utawa luwih, sing nduweni tataran padha. Tuladhane, Sinta bocahe sregep, dene mbakyune kesed. Tuladha kasebut dumadi saka rong ukara lamba yaiku Sinta bocahe sregep, lan mbakyune kesed. Banjur, diwenehi tembung pangiket “dene.” Ukara lamba sing sepisan (ngarep dhewe) ngrembug sipate manungsa, mula ukara lamba liyane uga ngrembug sipate manungsa.

2)      Ukara Camboran Susun

Ukara camboran susun yaiku gabungan saka rong ukara utawa luwih, sing salah siji saka ukara kasebut dadi pokok ukara. Tuladhane Rama ora nggarap PR, mula didukani gurune. Ukara pokok saka tuladha kasebut yaiku “Rama ora nggarap PR”,” banjur diterangake ukara sabanjure utawa ukara wuwuhan, yaiku “didukani gurune.”

 

 

CARA NGGAWE TEKS LAPURAN ASIL OBSERVASI

            Teks lapuran asil observasi rumaket karo panulisan ilmiyah sing nggunakake basa baku uga gampang dingerteni. Tujuwane, supaya pamaca bisa ngolehake informasi saka teks kasebut. Mulane, nalika nggawe teks lapuran asil observasi kudu nggatekake tata urutane.

            Sepisan, nemtokake tema lan topike. Tema lan topik kerep ditegesi padha, kamangka kalorone nduwe teges beda nanging isih nduweni sesambungan. Tema yaiku idhe pokok sing lumrahe dijupuk saka sawijning kedadeyan. Dene topik, kalebu perangane tema. Upamane, ana tema ngenani pendhidhikan lan topike, pendhidhikan ing masyarakat.

            Sawise mangerteni tema lan topike, banjur njingglengi langsung objek utawa kedadeyan sing diobservasi kanggo ngolehake dhata. Dhata sing diolehi, diolah banjur dikembangake dadi teks. Sing pungkasan, mriksa asile nulis teks kasebut, ngowahi, nambahi, lsp.

            Dudutan carane nggawe teks lapuran asil observasi, kaya mangkene:

1. nemtokake tema lan topike,

2. nglumpukake dhata (njinggleng langsung, wawancara, tintingan kapustakan, utawa angket)

3. ngolah dhata,

4. nggawe teks, lan

5. niti priksa asile.